Txupinazoa 2017
Zestoako amabirjinetan txupinazoa botako duen pertsona edo taldea aukeratzeko Zestoako Udalak, 2017ko uztailaren 7an egin zuen deialdiari erantzunez, honako proposamenak jaso dira:
Elkarte berria eta anitza
Trikiti elkarte berria
Herriko hainbat herritar, adin desberdinetakoak, uztartzen dituen elkarte irekia; bertan, euskal musika eta jai giroa sustatzen dituzte.
Herriko historialaria
Iñaki Azkune Mendia
Herriko historia ezagutzeko egin dituen ikerketa lan garrantzitsuengatik.
Inposaketaren kontra
Ikurriñaren aldekoak
Inposaketaren aurrean zestoarrok babesa eskaintzea. Zestoarron sentimendu eta nahiak zapaldu eta herritarron borondatea zapuztea besterik bilatzen ez duten agindua egon delako (udaletxeko balkoian Espainiako bandera jartzea). Gogoratu, azken herri galdeketan, zestoarrok euskal estatu burujabe baten alde agertutako jarrera.
Ipuin sariduna
Aitor Salegi
“Gazte Hitzak” ipuin eta kontakizun laburren lehiaketan, euskarazko modalitatean, 19-25 urte bitartekoen artean, sari nagusia eskuratu izanagatik.
Antzerki zaletasuna
Interpretazio eskola
Azpeitiko antzerki topaketatan, ikuslegoaren saria jaso zuelako Sweeney lanagatik, eta herrian antzerki hamabostaldia antolatzeaz, bertan sortu duen zaletasuna eta erantzun onagatik.
Bertsogintza
Erralla bertso eskola
Euskal Kultura eta sormena lantzen duelako.
Auzolana
Auzolanean ibilitako herritarrak
Zestoaren alde, auzolanean jardun izan duten guztien izenean: Santa Engraziako ermita eta erlojua zaharberritzen; Lauiturrietako garbilekua berritzen; ibai eta bide bazterrak garbitzen...
Organista
Julian Serrano
35 urtetik gora Zestoan organo-jole (Amabirjin festetan ezinbestekoa izan da bere lana) eta organoa mantentzen zaintzen, txukuntzen, konpontzen eta erakusten egin duen lana. Danbolin aldizkariko kolaboratzaile, erregeen kabalgatan ere urteetan ibili da lanean. Irakasle eta ikertzaile modura ere, beti Zestoa ahotan (Jose Maria Odriozolari buruzko liburua...). "Zalaparta handirik gabe" herriari eman dion guztiagatik.
Dantza
Itxaropena dantza taldea
Urtero antolatzen duten jaialdi hori asko gustatzen zaielako, eta lan handia egiten dutelako hori prestatzen (Herriko nerabeek Herri Hezitzailea proiektuaren barne proposatutakoa)
Lasterkaria
Jon Alberdi
Azken urteotan lasterketak irabazi edota podiumean dabilen herriko kirolaria izateagatik. Nahiz eta zuzenean ez duen kirola sustatzen, norbanako bakoitzak ikus dezake lanaren eta esfortzuaren ondorioz helburuak lor daitezkeela. Emaitzak: Goizutrail-en lehendabizikoa, 2017ko maiatzean. V. Iñaki Ruiz lasterketan irabazle. VIII. Flysch Trail 3. postuan. Arnoko XIII. Lasterketan irabazle.
Ondorengo proposamena ez da zerrendan sartu, helburu berdina zuen Herrira Plataformak 2012an bota zuelako txupinazoa:
Presoen eskubideen defentsan lan egin duten herritarrak. Euskal Presoen eskubideen zapia udaletxeko leihotik kentzeko agindua egon da. Gogoratu, konponbide garaiotan, bai udalak bai herritarrok urtetan zehar erakutsi dugun presoen eskubideen aldeko borondatea.